ការផ្អើលល្បែងជល់មាន់នៅបន្ទាយចក្រីក្នុងខេត្តព្រៃវែងបន្ទាប់ពីមានការផ្សព្វផ្សាយតាមបណ្ដាញសង្គម តាមពិតទៅ វាពុំមែនជាបទល្មើសចម្លែកស្អីនោះទេ ។ ព្រោះមិនថានៅតាមបណ្ដាខេត្ត ឬរាជធានីភ្នំពេញ គឺសុទ្ធសឹងតែមានបទល្មើសល្បែងស៊ីសងខុសច្បាប់ បើទោះបីមានបទបញ្ជាពីសម្ដេចធិបតី ហ៊ុន ម៉ាណែត នាយករដ្ឋមន្ត្រីតម្រូវឲ្យអាជ្ញាធរឃុំ-សង្កាត់-ស្រុក-ខណ្ឌ-ខេត្ត-រួមទាំងរាជធានីភ្នំពេញក្ដី គឺទទួលខុសត្រូវចំពោះបទល្មើសនៅក្នុងដែនសមត្ថកិច្ចរបស់ខ្លួនស្របតាមគោលនយោបាយភូមិ ឃុំមានសុវត្ថិភាពដែលបានរៀបចំតាក់តែងគោលនយោបាយដោយក្រសួងមហាផ្ទៃក៏ដោយ ។
តួយ៉ាងល្បែងស៊ីសងភ្នាល់ទឹកភ្លៀង ដែលសាងសង់រោងនៅលើអគារភ្នាល់ស៊ីសងរាប់ម៉ឺនរាប់សែនដុល្លាក្នុងមួយថ្ងៃៗនៅសង្កាត់អូរឬស្សីខណ្ឌ7មករា រួមទាំងបំបែកសាខា នៅតាមបណ្ដាខណ្ឌថែមទៀតផង ។ សួរថា មានអ្នកសាព័ត៌មានជើងខ្លាំងជើងខ្លោចណាហ៊ានធ្វើការចុះផ្សាយឲ្យវិនាសអន្តរាយបាន ។ មានខ្លះដែរ ដូចឃើញនៅក្នុងហ្វេសប៊ុកកន្លងមក ដូចកាលព័ត៌មានកីឡាមិនទាន់ត្រូវបានក្រសួងបិទ អាជ្ញាប័ណ្ណអ្នកអានព័ត៌មានមិនត្រឹមតែផ្សាយវាយប្រហាមេល្បែងរួមទាំងលោក ឃួង ស្រេង យ៉ាងចាស់ដៃប៉ុណ្ណោះទេ សូម្បីអ្នកសារព័ត៌មានដូចគ្នាក៏ត្រូវទទួលរងដៀលត្មេះថា បានយកប័ណ្ណទៅបើកលុយពីមេល្បែងភ្នាល់ទឹកភ្លៀងផងដែ ។ ក្រោយមកព័ត៌មានដែលបានចុះផ្សាយត្រូវបានទម្លាក់មិនខុសពីពាក្យគេថាចង្អុលដៀលត្មេះគេតែម្រាមដៃមួយទេ ប៉ុន្តែពុំបានមើលឃើញម្រាមដៃ 4 ទៀត កំពុងចង្អុលមកខ្លួនឯងនោះទេ។
ដូចករណីល្បែងអនឡាញនៅទល់មុខព្រលានយន្តហោះចាស់មានជនជាតិខ្មែរ-ចិនចូលលេងព្រោងព្រាតស្ថិតក្នុងសង្កាត់ចោមចៅ ខណ្ឌពោធ៍សែនជ័យ រាជធានីភ្នំពេញ ចូលតាមច្រកស្តុបផ្សារព្រៃទារ ដូចឃើញក្នុងរូបភាពនេះស្រាប់ ។ ទោះបីមានការចុះផ្សាយតាមបណ្ដាញសង្គម រិះគន់អធិការនិងអភិបាលខណ្ឌពោធិ៍សែនជ័យយ៉ាងណាក៏ដោយ ក៏អាជ្ញាធរ និងសមត្ថកិច្ចហាក់ធ្វើអត់ដឹងរឿងទៅកើត ។
សរុបសេចក្ដីទៅបទល្មើសល្បែងស៊ីសងគ្រប់ប្រភេទ បើគ្មានលុយ គ្មានអំណាច គឺគេចាប់ហើយកុំទៅឆ្ងល់ពេក ។ ព្រោះបទបញ្ជាឲ្យបង្ក្រាបបទល្មើសល្បែងស៊ីសង វាហាក់បីដូចគ្រាន់តែជាសារនយោបាយសម្រាប់ឲ្យអាជ្ញាធរ និងសមត្ថកិច្ចមានលេសក្នុងការស្វែងរកលាភសក្ការៈតែប៉ុណ្ណោះ ។ ដូចករណី ដែលបានរៀបរាប់ជាតឹកតាង តិចទួច និងបញ្ជាក់បានថា បើបទល្មើសល្បែងស៊ីសងពិតជាត្រូវបង្ក្រាបមែននោះ គឺពិតជាគ្មានអាថ៌កំបាំងដែលអាចលាក់លៀមពីភ្នែកអាជ្ញាធរនិងសមត្ថកិច្ចបានឡើយ៕
រូបភាពអ្នកយាមទីតាំងល្បែងអនឡាញ នៅសង្កាត់ចោមចៅខណ្ឌពោសែនជ័យ
