ក្រុមគ្រួសារអ្នកស្រីឆូ វត្តីដែលមានលំនៅដ្ឋានតាមបណ្ដោយផ្លូវបឹងស្នេហ៍ ក្នុងភូមិបឹងស្នេហ៍ ឃុំធាយ ស្រុកបាភ្នំ ខេត្តព្រៃវែងបានស្រែករកយុត្តិធម៌ ព្រោះតែអាជ្ញាធរខេត្តបញ្ជាកម្លាំងឲ្យវាយកម្ទិចជណ្ដើរបេតុងចេញចូលផ្ទះគាត់។សកម្មភាពវាយកម្ទិចកាំជណ្ដើរផ្ទះអ្នកស្រីឆូ វត្តី (ដូចឃើញក្នុងរូបភាព) ធ្វើឡើងនៅថ្ងៃទី18ខែមិថុនាឆ្នាំ2026កន្លងទៅថ្មីៗនេះ។
ក្រុមគ្រួសារម្ចាស់ផ្ទះបានស្រែកទ្រហ៊ោយំលាយឡំនឹងការចោទសួរថា តើហេតុអ្វីបានជាផ្ទះគេសាងសង់ជណ្ដើរចេញចូលដូចផ្ទះខ្ញុំដែរ តែអាជ្ញាធរមិនវាយ ដោយធ្វើការឆ្លើយតបថា ផ្ទះគេធ្វើយូរមកហើយទៅវិញ ។ នៅពេលសួរថា ចុះផ្ទះដែលទើបនឹងធ្វើដែរនោះហេតុអ្វីមិនវាយកម្ទិចផង?។
ជាមតិគេហទំព័រកាសែតជាតិ ពាក្យថាហេតុអ្វីៗៗៗមិនខុសអ្វីពីសុភាសិតខ្មែរលោកពោលថាប្រាជ្ញមួយពាន់គឺដេញមិនទាន់ពាលមួយនោះទេ ។ ព្រោះចម្លើយពិតប្រាកដ បើអ្នកផ្សេងធ្វើជណ្ដើរបេតុងក្នុតំបន់តែមួយ តែក្រុមគ្រួសារឆូ វត្តីត្រូវបានគេវាយកម្ទិច ជាសត្យានុម័ត គឺមកពីមិនបានផ្ដល់ផលប្រយោជន៍ឲ្យអាជ្ញាធរ មិនមែនហេតុអ្វីនោះទេ ។ ដូចករណីលោកស្រី ឡៅ អានី ទិញដីនៅខេត្តព្រះសីហនុជាងប្រាំហិកតា រួចធ្វើប្លង់ជាន់លើដីគេបានដល់20ហិកតា សួរថា បើគ្មានលុយសូកប៉ាន់មន្ត្រីអ្នកធ្វើប្លង់តើអាចបង្កើនទំហំដីបំពានលើដីអ្នកផ្សេងបានដោយរបៀបណា? ។ ដូចករណីដីនៅភូមិកំពង់ពោធិ៍ឃុំក្រាំងយ៉ូវ ស្រុកស្អាង ខេត្តកណ្ដាល ឈ្មួញទិញដីឃុបឃិតជាមួយមន្ត្រីភូមិបាលរួចគម្រាមម្ចាស់ដីថាជាដីអាងរដ្ឋបើមិនលក់ក៏គេយកដែររួចធ្វើប្លង់រឹងលក់ឲ្យចិនបាន ។ ចំណែកអ្នកមិនព្រមលក់ឲ្យឈ្មួញត្រូវបានមន្ត្រីជំនាញដាក់ចូលជាដីអាងរដ្ឋឆ្កុយទៅ ។
សួរថា ច្បាប់ភូមិបាលនៅឯណាដែលថ្នាក់ដឹកនាំអះអាងថាប្រជាពលរដ្ឋដែលអាស្រ័យផល5ឆ្នាំដោយគ្មានការតវ៉ាណាមួយពីរដ្ឋឬឯកជនគឺមានសិទ្ធចុះបញ្ជីដីធ្លីស្របច្បាប់បាន។ផ្ទុយទៅវិញពលរដ្ឋអាស្រ័យផលជាង40ឆ្នាំដោយគ្មានវិវាទអ្វីសោះដោយគ្រាន់តែមិនព្រមលក់ឲ្យឈ្មួញក្នុងតម្លៃថោកក៏ត្រូវបានមន្ត្រីជំនាញចោទពលរដ្ឋថាអាស្រ័ផលលើដីរដ្ឋទៅវិញ។
ឧទាហរណ៍ខាងលើនេះគឺចង់បញ្ជាក់ប្រាប់អ្នកស្រីឆូ វត្តីឲ្យជ្រាបថា ពាក្យហេតុអ្វីដែលអ្នកស្រីស្រែកទាមទារ សូម្បីអ្នកប្រាជ្ញក៏រកចម្លើយជូនអ្នកស្រីមិនបានដែ ព្រោះរឿងអយុត្តិធម៌ដែលកើតឡើងពាសពេញសង្គមខ្មែរសព្វថ្ងៃ គឺផ្ដើមចេញពីលុយ បើគ្មានការសូកប៉ាន់និងអ្នកស៊ីសំណូកអ្នកស្រីក៏មិនទទួលរងនូវភាពអយុត្តិធម៌ដូចពេលនេះដែរ ៕
